განცხადებები

თბილისის მერია იწყებს პროგრამის - „ისწავლი და დასაქმდი“ ახალ ეტაპს და 17 სექტემბრიდან 1-ელ ოქტომბრამდე აცხადებს დაინტერესებული მოქალაქეების ონლაინ რეგისტრაციას პლატფორმაზე www.dasakmdi.ge.

პროგრამა ითვალისწინებს თბილისში რეგისტრირებული მოქალაქეების პროფესიულ მომზადება/გადამზადებას მოკლევადიანი პროფესიული კურსების მეშვეობით, შრომის ბაზარზე მოთხოვნად სპეციალობებში და კერძო სექტორთან თანამშრომლობით დასაქმების ხელშეწყობას. მოქალაქეებისთვის აღნიშნულ კურსებზე სწავლა უფასოა.

აღსანიშნავია, რომ პროგრამის ფარგლები გაფართოვდა და მიმდინარე მიღებაზე 1 500 მოქალაქის მომზადება/გადამზადება განხორციელდება 80 სპეციალობაში - ციფრული ტექნოლოგიების, მშენებლობის, ინჟინერიის, კვების, ტურიზმის, მომსახურების, დიზაინის, ტრანსპორტის, ვეტერინარიის და ფინანსების სფეროში.

არსებულ მოთხოვნად პროგრამებს დაემატება 19 ახალი პროფესიული კურსი, მათ შორის:

• ურბანული მებაღეობა
• კარიერული დაგეგმვის სპეციალისტი
• სამშენებლო ხარჯთაღმრიცხველი
• ფიზიკური მომზადების მწვრთნელი
• ვიდეოსამეთვალყურეო სისტემების ტექნიკოსი
• ტვირთების გადაზიდვა-კონტროლის სპეციალისტი
• საიუველირო საქმის მასალათმცოდნე
• ტყავის და ბეწვის აქსესუარების რესტავრატორი
• მარკეტინგული ტექნოლოგიების სპეციალისტი და ა.შ.

მიმდინარე მიღებაზე, არსებული მოთხოვნის გათვალისწინებით, მნიშვნელოვნად გაიზარდა ციფრული ტექნოლოგიების მიმართულებით არსებული საკონკურსო ადგილები, რომელთა სრული ჩამონათვალის ხილვა ასევე, შეგიძლიათ ვებგვერდზე - www.dasakmdi.ge.

კონკურსში მონაწილეობის კრიტერიუმებია: ქ. თბილისში რეგისტრაცია; მინიმალური ასაკი 18 წელი. კურსების ხანგრძლივობა შეადგენს 1-დან 7 თვემდე პერიოდს. სასწავლო პროცესი მოიცავს თეორიულ და პრაქტიკულ მეცადინეობებს, როგორც ონლაინ, ისე ადგილზე დასწრებით. მონაწილეთათვის, რომელთაც არ აქვთ ონლაინ კურსებზე წვდომის შესაძლებლობა, აღნიშნული სერვისი უზრუნველყოფილი იქნება თბილისის მედიათეკებში.