„ევროპის საუკეთესო მიმართულებების" (EBD) კონკურსზე 2020 წელს თბილისის მიერ წარსადგენი ფოტოების კონკურსში გამარჯვებულები გამოვლინდნენ

თბილისში არსებული ტურისტული პოტენციალის პოპულარიზაციის მიზნით, თბილისი 2020 წლის 15 იანვრიდან მონაწილეობას მიიღებს „ევროპის საუკეთესო მიმართულებების“ (European Best Destinations) - EBD-ს მიერ ორგანიზებულ კონკურსში. დედაქალაქი აღნიშნული ორგანიზაციის წევრი მიმდინარე წლის აპრილში გახდა. სწორედ ამ მიზნით, თბილისის მერიამ გამოაცხადა კონკურსი ფოტოების შესასყიდად, რომლებიც განთავსდება EBD-ს ოფიციალური ვებგვერდის თბილისის გვერდზე (https://www.europeanbestdestinations.com). აღნიშნულ ფოტოებზე დაყრდნობით მოხდება თბილისისთვის ხმის მიცემა „ევროპის საუკეთესო მიმართულების“ ჯილდოს მოსაგებად.

ფოტოკონკურსზე წარდგენილი ფოტოები შეაფასა ჟიურიმ, რომელიც საზოგადოებისათვის ცნობილი ფოტოგრაფებისაგან შედგებოდა. თითოეული ფოტო შეფასდა 0-10 ქულიანი სისტემით (კრეატიულობა, გადაღების რაკურსი და კონკურსის თემატიკასთან შესაბამისობა). ჯამში გამოვლინდა 30 გამარჯვებული ფოტო.

კონკურსში გამარჯვებული ფოტოგრაფები არიან:
● ანდრეი აკოფიანი
● გიორგი გვრიტიშვილი
● გიორგი შერმაზანაშვილი
● ზაზა ნიკოლოზიშვილი
● იური აკოპოვი
● ლევან გიორგაძე
● ლუკა ბაიდოშვილი
● ხატია-ჯუდა ფსუტური
კონკურსის ორგანიზატორი ევროპული ორგანიზაცია EBD არის ბრიუსელში დაფუძნებული არაკომერციული ორგანიზაცია, რომლის ძირითად საქმიანობას ევროპის ქალაქების ტურისტული და კულტურული პოპულარიზაცია წამოადგენს. EBD-ს ყოველწლიური კონკურსი, სახელწოდებით "წლის საუკეთესო ევროპული მიმართულება“, მონაწილე ქალაქებისათვის პოპულარიზაციის საუკეთესო საშუალებაა, ვინაიდან კონკურსი მედიადაფარვის მასშტაბით და მომხმარებლის ჩართულობით გამოირჩევა.

03 ივლისი 2019